جديد الحملة 2

كان عندنا معاد مع وزير الثقافة دكتور عماد ابوغازى عشان يشوف الافكار والمشاريع اللى كانت معانا والحمدلله الراجل تقريبا وافق على معظم الطلبات وخدنا التصاريح اللى كانت فضلالنا عشان نبتدى شغل بقه وللامانة شخصية محترمة جدا وشبة معترضش على اى طلبات لينا.

لازلت مش عارفة العدد بالظبط قد ايه لأنه فعلا زاد اوى ففكرة ان العدد يتحدد دى تبقى ان شاء الله فى اخر اجتماع قبل مننزل لأن كده لازم هنقسم نفسنا مجموعات ! 


فى كورس توعية سياسية للشباب اللى عايزة تشارك معانا بس ناقصها شوية حاجات هيتشرح فى من اول يعنى ايه انتخابات لحد التيارات كلها من اليمين لليسار على 6 محاضرات وبندرس نقللها كمان، واللى هيدى المحاضرات دى ناس موثوق فيها ومعروفين على الساحة السياسة بس مش هقولكم عليهم الا لما نحدد المواعيد ..


اى استفسار بخصوص الموضوع ابعتولى على الأيميل 


شكرا :)

جديد الحملة

الحمدلله الموضوع ماشى كويس جدا وتم التنسيق مع تقريبا كل المجموعات اللى فى المعادى من اللى انا فاكراهم يعنى : 

1-maadians

2_(اللجان الشعبية للدفاع عن الثورة (المعادى -البساتين - العرب - زهراء المعادى 

3_حركة كفاح

4-رابطة شباب الثورة التقدمى 

5-ائتلاف شباب المعادى

6- شباب جمعية رسالة 

7-حركة رؤية

8-(اعضاء الاحزاب من سكان المعادى(حزب الجبهة-المصرى الديموقراطى) 

9-حملة دعم البرادعى

وغير الافراد اللى لسه منضموش لمجموعات, مقدرش ادى عدد تقريبى بس هو عدا كل توقعاتى الحقيقة يعنى نقدر نقول عدا الالف بشويتين.

التفاصيل بالظبط و العدد واقرب اجتماع ان شاء الله هقولكوا عليه فى اقرب وقت.

خدنا تصريح بالاجتماع فى الاماكن اللى كنا عايزنها فى المعادى وعندنا معاد مع وزير الثقافة هيحضروا انا وكام حد اعرفه كمان الاسبوع ده ..

وحقيقى الفضل فى الموضوع ده كله من اول تجميع المجموعات دى يرجع لمحمود جمعه هو اللى كلمنى وقللى انه جمع الناس دى كلها.

اللى عايز يستفسر عن اى حاجة بقه انتوا عارفين الطريق 

والى لقاء قريب اوى ان شاء الله

شباب وعى

حملة علشان صوتك مهم !

بإختصار شديد و من غير مقدمات، إحنا مجموعة شباب لا ننتمي لأي حزب سياسي ولا حركة ولا ائتلاف و بتجمعنا كلنا مصر،

عايزين نعمل حملة لتوعية الناس في الشارع و المناطق المُهمشة فكرياً قبل إنتخابات مجلس الشعب بفترة كافية عشان الناس يختاروا

صح من غير ما حد بفهمهم غلط لمصلحة شخصية، ولا يربطلهم السياسة بالدين او يخوفهم من مجهول او يخليهم يبيعوا صوتهم لناخب معين.

الحملة ده فيها عدد كويس لحد دلوقتي و كل واحد عنده افكاره، بنحاول نجمعها عشان نشتغل صح و نوعي الناس بشكل بسيط.

هنتابع كل اللي هيترشحو للأنتخابات البرلمانية هننقل للناس أخبارهم و تاريخهم و برامجهم الانتخابية عشان الناس تختار الصح.

ولحد ما نعرف المُرشحين عندنا وقت كثير نتجمع و نفكر مع بعض و نحاول نجمع مجموعات بتفكر شبهنا عشان نتحرك كلنا "ايد واحدة" و هنبتدى فى المعادى لحد ما نبقى شبكة كبيرة تقدر تخدم مصر كلها

الرؤية: نشر الوعي لكل فئات الشعب المصري بشكل حِيادي يضمن حرية التعبير عن الرأي بشكل اكثر وعياً (لثقتنا بالناخب المصري)

هدفنا: عمل حملات توعية سياسية للمواطن المصري من خلال:

عقد المصالحات- الرؤية الاستراتيجية الجامعة - تفعيل قيم الديمقراطية - الوصول إلي عمق المجتمع

الوسائل: مجموعات من الناشطين في كل منطقة ينزلو الشوارع للناس، عمل حملات إعلانية.

الأدوات: موارد بشرية- افكار- وسائل إعلانية

الخطوات: اجتماعات دورية - عصف ذهني - تجهيز مواد إعلانية و تصويرها - التواصل مع اطراف مختلفة بعمق المجتمع - التواصل مع شخصيات مؤثرة.

التجمع: كل يوم جمعة

المكان: المعادي

للمشاركة ارجو ارسال ايميل الى

Raneemih@gmail.com او

Mohamed@ph-agency.com
او على تويتر http://twitter.com/#!/RaneemIbrahim

وشكرا